غنوه فى حب مصر
باحبها وقلبها عارف
واعلنها وانشرها صحايف
ده منين ما اروح والله انا شايف
جوه العيون احلى صبيه
فى حبها انا عشت ياناس
عمرين محبه وفا واخلاص
فى حضنها اجمل احساس
وف خوفها م الغربه عليا
يا أمى عمرك ماتخافى
دينك ده شايله على كتافى
برقبتى والله ومش كافى
لو تندهى مره عليا
ده انا اللى شربان من نيلك
وانا اللى غرقان ف خيرك
ومهما طارت زغاليلك
لابد ترجع للغيه
فطمانى ياامه على حنانك
وكبرت من دفا احضانك
ووعيت بفكرك وامانك
وشقاوتى حب وملاغيه
مليت كيانى بأثيرك
ومشاعرى كلها تأثيرك
وعمرى ما هاحس بغيرك
ولايمتلك قلبى عليا
مصريه ايوه انا مصريه
وافخر بجمايلها عليا
واسرح ف يوم ما اردلها
واحنى كفى من طينها
واشم ريحه ضفايرها
تهوّن الغربه عليا
4 comments:
//
..
العزيزة عايدة
مبروك المدونة
..
كلماتك عاشقة لمصر
أحاسيس مرهفة وصادقة
تملأ الروح بالمواطنة والجمال
..
أحييك
//
شكرا جزيلا يا شاعرة الكلمة الرقيقة والوجدان الأرق
الموهوبة عايدة العشري
تحياتي العاطرة
محمد نديم
الروائى الحالم
محمد العشرى
الف شكر على وقتك
وجودك بجانبى له اجمل الاثر علىّ
دمت نعم الاخ والصديق
محمد نديم
يسعدنى وجودك واحساسك
الشكر لك ياصديقى
ودائما فى انتظار طلتك الوضاءه
لتنير امام قلمى الطريق
Post a Comment