على هامش الكون
فى ليل مجنون
انا وحدى
باسابق عمرى بالمندار
وبإرادتى
بالاحق الموج
وانا عارف بانى باحارب التيار
نجوم حايره
وميت دايره
بتجذبنى
تسلمنى بإيد حانيه
على دايره تهدهدنى
يفوت بكره
وانا باجتر ف الذكرى
وباسبح فى جحيم لافكار
وبالراحه , أيا عقلى
لازلت غرير
فى عالم غير
لازلت نضيف
فى دنيا الزيف
وفيها البياض
كدبه
والوان طيف
ف ليه تحتار
ده أحسنلك
تعيش وتموت على الهامش
ولا تدخلشى بسذاجتك فى قلب النار

ماهوش ذنبى....
ياليل هدّى فهمت خلاص
لكن عديت ,مانيش راجع
دى كات شعره بتوصلنى
أمل باهت , ألم واجع
وخوفى أكون
فى كون مجنون
صدى ذكرى قمر طالع
ماهوش ذنب انى ما اتعلمت
أكون سالك ف ليل حالك
أبيع العمر والاحلام
على أعتاب نهار قالع
حياؤه , بيشاور لبعيد
ما بينا أكيد

...غدا ساطع