قول ياشاعر
قول وأشجى قلوب سامعين
صحصح ياشاعر
وصحى الوهم ف العيون الدبلانين
دبلها طول الاجل
على مصطبة الخيال قاعدين
فاردين شراع الامل ع البر
وفكرهم امبحرين

قول كمان
قول وغنى ع الربابه
يمكن يبان لينا صحاب وسط الديابه
تاخد بثارنا بعد ما بقينا غلابه
رافعين لواء الولاء بسذاجه وطيابه

قول وغنى
ع اللى من دمانا بات كفه محنى
واللى ميت م الشبع
وعينه ع اللقمه اللى منى
واللى ناوى يحنى راسى
ويرخى منى عين وننى

حط رحله فوق دماغى
أصله فصله قادر وباغى
يحجب النور عن عيونى
ويحتوينى بقهر طاغى

فاكر انى يوم هاسلّم
وبخضوعى بات بيحلم
غره يمكن يوم سكوتى
وانه اصبح لى معلم

لأ..ياصاحبى اللدود
كل شىء وله حدود
مهما طال الظلم حتما
ييجى يوم والنور يسود

انا شاعر ونفسى يااااه
فى مدينه تساع الكل
وأفلاطون واخد منى مفاتحها
ملضّمها كعقد الفل
وشايف من بعيد نورها
برغم الضل
نهار بيلوح

انا شاعر وعامل من حكاياتى
سفينة نوح
ومالك جوا كلماتى وحروفها
نواصى البوح
ألملمها وأنظمها
وأنثرها وأبعثرها
عبير ع الكل
وين ما تروح

تعالى معايا يالا قوام
واتمسك بمجدافى
وأرمى الحزن والالام
ورا ينبوع أمل صافى
وخلينا نشوف بكره
عيون صاحيه
ومش هتنام
غير امّا ترجع الانغام
فرح هيهل
ويتلاشى أنين النوح


تعالى نقوم نصحى الليل
ونغزل عشقنا مواويل
على السمره ام خصر نحيل
فى توب أخضر وطرحه تل
وخطاويها الجنان والدوح

على ضفاف الامل ...والنيل
سلاسل فضه دى وللا ياناس تراتيل
لنجم الليل
بيتوضى فى نسيم الطل
وتسابيحه ترد الروح

خيال شاعرماهوش تهويل
ولا تضليل
دى احلامنا ودى قلوبنااللى ليها دليل
بكلمة حب هنداوى جريح وعليل
وكلمة حق تفلق النهار م الليل
نقولها امام حاكم جائر
مادام بالصدق, ونجاهر
وقاصدينه كريم قادر
رحيم عدله ده فوق الكل
عليم بالنيه قبل البوح