حلم النهضه

الفجر جاى يا نفس قومى وصحصحــى
واتوضى من نور الاله وصلى واركعى
يشرح ضميرك وينبض قلبك العامر
بحب الخير يالا قومى وقدمـــــــــــــــى

وافتكرى ان الحسنة دى تترد لك عشـرة
والكلمة الطيبة تطرح لنا شجــــــــــــــرة
وسعيك بين حيطان بيتك
ده سعيك بين صفا ومــــــــــــــــــــــروة
ورزقك ده هيوصلّك ولو كنتى
نملة وحيدة فى ليل مظلم على صخـــــرة
فى صحة ف علم وللا فى عمل صالح
ف اولادك
فى مال فى جمال فى
وقتك تطرح البركة

بس المهم الرضا بالله وقضاؤه
وحسن ظن وثقة وبشكر نعماؤه
وتطويعها لفعل الخير
وبذل الروح لإرضـــــــــــاؤه

ده ورد يومى ودى اذكار صباح
ودى صلاة الضحى وده سيد استغفار
تفتح خزائن رحمته والخير عليكى يهــــل
ده خير العمل ادومه حتى يا ناس لو قــــل

وبعدها اسعى
واربط كل اعمالى بهدف أسمــــــــــــــى

باربى إبنى وباحلف ليكون صلاح الديــن
اللى عليه الأمل معقود لدنيا وديـــــــــــن
وبنتى دى الزهراء ام الحسن والحســـين
مع احترامى لاهل البيت مع الفارق
يارب دى نيتى ودول مثل اعلـــــــــــــى

يارب قوى العزم وارفع لى ف الهمـة
ووفقنى اقوم للدين مقام الحمد للنعمــة
بروحى بجهدى باولادى
ده دورى ف نهضة الامـــــــــــــــــة

عايده العشرى

رساله الى اوباما

وجهٌ صبوحْ ..وعنين بتنْضَح بالآمال
ومحَمّسه كل العيون
وبنبرة الصوت اللى جاى بنهار جديد
ماتفرقوش بين لون ولون

وبابتسامه يقول: ياناس
أيْوَه احنا قادرين ع الحياه
طول ما إيدينا مْشبِّكَه
سيبكُمْ بقا م الصَعْلكَه
والهَمّبكَه
والفذلّكَه
والهرّطقَه
أمّا صحيح ما بتختِشوش
من عهد قابيل.ليك يابوش

لكن خلاص
الفارس المِغوارخلاص صَحْصَحْ وقَام
وركبها موجة الحياه وشَدّ اللِجام

وغُناه جميل
راح ينطوى الليل الطويل
ومافيش خلاص شئ مُستحيل
بس انتَ إحلم.. وانْتَشِى

لو جه ف يوم العدل ساد
ف أمان تعيش كل البلاد
وسلام على ايديك يتنشِى

لو ييجى يوم يطلع نهار
لاحروب ولا تهديد دمار
والعُنصريّه تختفى

ترجع حقوق كل الشعوب
وتَدْين إليك كل القلوب
و الإنسانيّه تِحْتِفى

نصر بصحيح
على كل رهبه وكل خوف
وبمْصداقيه ووعْد دَيْن
تصطف لك كُل الصفوف

قوم يازعيم -الإنسانيه كُلها
مستنياك ...مِتشوّقَه

تعدل ميزان الحق والخيروالجمال
لحْسَن ده ليل الظُلم طال
وماعدش باقى غير امال

وعيون عليك مِتعَلّقَه

عايده العشرى

وبالحذاء... وداعا

هُنئتَ ياوجه الخسيسِ بنعلهِ
فصلُ الكلام, ختامُ المسكِ حياك
شُيعت باللعنات وابل غيثهِ
حممٌ وجام ومايرقى مُحياك
صدقت كذبك واكتحلت نفاقهم
واليوم تأتى مودعا بغباك
خدعوك إذ قالوا صديقا مرحبا
بدل الورود, نِعال القوم كافاك

يامدعٍ قد جئتُ ليلا مُلتحف
ثوب الصديق ,نبؤة الأطهارُ
ذئبٌ يحثُ الخطو نحو فريسة
حلو الكلام ومنطق الاشرارُ
وبدعوة التحريرتبدو مبشرا
وتحيك فى جُنح الظلام ستارُ
خُدع وطال الابرياء شرارها
وتسابق الجُهّال والسُمّارُ
تمزيق اوصال الضحية- شعبها
مابين مخدوعٍ ومصطلٍ بإوارُ
وتمراعوامٌ خرابٌ دارُها
وعقود نهبٍ فى رداء إعمار

بوركت يانعل الفتى إذ تستطع
رد الاهانةِ عن بنى عمّار

الاستاذ عزت السعدنى فى جريدة الاهرام

http://www.ahram.org.eg/archive/Index.asp?CurFN=INVE2.HTM&DID=9697
تحقيقات


44469
‏السنة 133-العدد
2008
سبتمبر
6
‏6 من رمضان 1429 هـ
السبت

تاهت جهاتنا الاربعة‏!‏‏
الشعر هو نبض الحياة وهو أكثر ألوان الأدب تعبيرا عن كل ما يجري في حياتنا‏..‏ من مشاعر وهواجس وطنون‏..‏ وهو أكثر ألوان الأدب وصولا إلي قلب الحقيقة من أقصر طريق وبأقصر العبارات وأدقها تعبيرا وكأنها ورقة البوسطة فوق خطاب مرسل إلي كل البشر‏..‏ الشاعرة الرقيقة عايدة العشري كتبت إلي تقول‏

‏بارد يا حضن الوطن والغربة قاتلاني

ومنين اجيب الدفا للعمر من تاني

وفين الاقي الوفا ده الُبعد خلاني

تايه ما بين الدروب ويحدني ميت حد

اشكي له منه إليه لم التقيلي رد

هانت دموعي عليه ولا عاد يهمه حد

مع طول حنيني إليه لا طايلة سما ولا أرض

عيني عليك يالغريب مزنوق في حارة سد

عايش ما بين البشر نفسك تقيم راسك

وتداري عنهم وجيعتك وتخفي احساسك

ترسم قوي الابتسام والفخر بأساسك

وتلون الأيام أحلام بلون الورد

وعارف انه كلام وما ينطلي علي حد

وتبان حقيقتك قوام بهتانه وقت الجد

وفكرك الاندال ترحم عزيز ذل

ده اللي مايلقي الدفا في حضن بلده أتهد

توووت حاوى

قالك أيه....قالك آاااااه
قالك مثلا .....
عندى لكل همومك حلا

توووت.. تيييت
وحماره برجليها العارجه
هتطلّع ف الآخر زيت

حزّر فزّر
ده خيال أغبر
وحَدادى بتحدِف كتاكيت

بعد الهَبره الكُبرى ماراحت
لسه هنلعب فى الفتافيت

كام ميِّايه
تحلوّنْ رُوحك
ميه وفاتت على عطشان
ذو أملاك وتبات عريان
تعمل أيه؟؟

بيع... بيع
بيع بمزاجك بس إياك
ترجع تانى تبص وراك

بيع مرسومك
وانسى همومك
واياك تنسى تسد رسومك

وادعى لسلطان المماليك
اللى بكرمه وشدة عطفه
حَلّ الكيس اهو وراح يديك

واللى إدّاك إياه بشماله
راح يسحبُه تانى بيمين

بعد الهيصه والبولّيْكه
ترجع كما كُنت يامَسكين

ويكون حقك فى الدنيا دى
راح ف مسافة غمضة عين

لاوطن تنتمى
لاكبير تحتمى

وقليل إن ماطلعت بدين

السيرك الكبير.....
سيرك الوزارات ....قرب قرب

يامواطن قوم تعالى اتفرج

قمح مُصاب ومصنف أعلاف

راح نعمله عيش مش بنهرّج

هنلخبطه نشا على عفن أبيض

ونلت ونعجن ونرجرج

راح يطلع فينو وعيش وجاتوه

كل واشكر وافرح واتبهرج

قرب .......قرب

شوف واستغرب

وافتح بالقوى عينك ديه

اعلاف ..اعلاف

يتاكل حاف

على رأى قادتنا السياسيه

وبدون تفسير

ال فرز اخير

ومطابق الوصفه القياسيه

ع الصحه تمام

يامواطن نام

وف بطنك بطيخه صيفيه

قرب قرب

واسمع لى ياعم

شبيك لبيك

نام بقى واتلّم

أصل السيراميك

من عيشكوا أهم

من فرز اول

من اغلى بلاد

لسيادته يجيله ويتغندر

والقمح يجيلك فرز اخير

بالبق مغمس ومبخّر

وافتح بقى بقك واتنحرر

عيط واشتكى كان غيرك اشطر

طول ما الاوراق بتقول ده تمام

على اقرب حيط بدماغك اكسر

عجلت اليك ...وسبت الدنيا علشانك
وكلى حنين
وانا .......
انا مين؟؟
يادوب نقطه ف.... عظيم شانك,,
ملانه يقين
وكل جوارحى بتردد يارب آمين
هتقبلنى ف جميل كنفك
وتغمرنى بكريم عطفك
وتشملنى بعظيم عفوك وغفرانك

يارب آمين
عجلت اليك وباينّى راح اتدروش
واميل طربا
وابص لفوق
وكل منايا تنظرلى بجميل لحظك
ونتلاقى ف لحظة شوق
يحل النور مابين ضهرى وبين الوش
ويظهرلى حقيقة الكون.. بلا تجميل
بدون تزييف
وتلهمنى افرق بين خداع الحق غموض الغش
ومين غيرك ياربى عليم بخائنة العيون والحس
ومين غيرك يارب عليم بمكنون الصدوروالنفس
ومين غيرك يفيض على عبدك المظلوم
بفيض حنان
وبرد سلام
وصبر جميل ...لحين مايعود بنى آدم
لرب الحق
ايديه ف الشق

يافرحة قلبى بقدومك ...عزيز وحبيب
ياكحك فطارنا من صومك.وشاى بحليب

ونسمه تهل على توبك
ياساجد تشكر الرحمن
على نعمة تمام رمضان
ويملا قلوبنا مطلوبك..قريب وغريب
يعودها علينا دى الايام
رضا ورحمه
تدوم لمة صلاة العيد هَنا وزحمه
ومسحة عفو ع الدنيا بدون تأنيب

ودعوه ملايكه شايلاها
وفرحه تمسح الآهه
وضحكه ع الوشوش بتداوى
من غير طب وللا طبيب
ونصره ياأمة الاسلام
نقول إنشالله... فرجُه قريب

حبيبى يابن عبداللاه
يافارد ع الوجود نورك
بيهدى العقل قبل القلب
ويستشعر عبير طيفك
يضم الكون برحمه وحب

وواخدنا لطريق مرسوم
وخير مقسوم لاتباعك
ومستنينا ف نهايته بأحضانك
يدوب كل التعب والنصب

شفاعه من حبيب يقدر
وتحت العرش ليك يُذكر
وقد الدنيا ما تمرر
تلاقى الجنه وسع ورحب

بشربه هنيه م الكوثر
على ضفافه قصور مرمر
وحور العين تتمخطر
ترحب بيك يزول الرهب
وويا حبيبك الهادى
وملايكه ربها تنادى
تسبح حمده وتكبّر
هنيالك ومحلى الصحب

حبيبى يابن عبد اللاه
دليلى إليه جل علاه
وعملى غيض فى فيض هُداه
وأملى....ألتحق بالركب

إرهابى......من جباليا
إرهابى....وف إيدى حجاره
وباعافر... ف ضلام الغاره
واصطاد وف- عتمة أحلامى-أمهر قناص

إرهابى ...وف عينى دخان
وف صدرى يفور البركان
ويقيد بلهيبه لو فاضل ف الكون إحساس

أرهابى... ف ودانى سرينة
أسعاف بتدوى
بتلم ف لحمى المتغمس بتراب ورصاص

إرهابى ...وف قلبى النار
وعيالى بتصرخ ....التار
ف رقبتك يابا وسبحانه أمرك بقصاص

إرهابى...ولا غيط ولادار
واللقمه, فرضولها حصار
والجوع مايموّت
ده الميت من يقتل ف القلب حماس

لوتغيب شمس الحياه
شمسنا مايوم تغيب
لو يغيض نبع الوفاء
نبعنا دايما يفيض
نبعنا رقراق صافى
شمسنا نورها يعافى
نبع نور طه الحبيب

عمت البشرالخطايا
جهل ظلم للبرايا
إلا أنت
طُهر قلبك
خلى ربك
منّ ع الكون
بالهدايه

منّ بالدين القويم
أوحى قرآنه الحكيم
خافت الجبال حمله
أشفقت من هول أمره
إلا أنت
وسعه قلبك
صدع بالامر العظيم

أى نوعٍ م البشر؟؟
هادىٍ امين
والرساله؟؟
رحمةٌ للعالمين
أىُ شرفٍ
يا أمام المرسلين
منذ آدم وألى يوم الدين

أى قادم م الظلام
يجهل قدره
فرط نور
والفراش
أُدمىَ بصره
يترنح والسقوط
مبلغ أمره
لايضير النور
سقوط او قيام
رب ضاره ..
ان بعد العسر يسرا
والشراره
اوقدت م الجسم فكره
وحدت الجمع من اول عبره
اذرفتها عين طال بيها النيام

والامانه اللى فى رقابنا؟؟
محتاجه الرجال
خيرُ خلفٍ
للصحابه
والقرابه
خيرُ سلفٍ
أقتداءا وامتثال
الخليفه
اللى جا نهجك حليفُه
واللى متربى على هدى النبوه
واللى جمعتهم أخوه
قاسيه ع الكفار
ومابينهم...لطيفه

واللى
رهبان المسا
فرسان نهار
سفرا محمد
اللى بتشع وجوههم
نور ونار
الايمان ف القلب
يصدقه العمل
يبقى الامل

والخير فينا
يُملى علينا الاعتذار

الله الله يابدوى جاب اليسرى
وابطالنا اهى راجعه من كوماسى جايبه الفرحه

الله على سجده تهز قلوب ملايين ملايين
تسبى عيون وتحجّب الملعب بيقين
فراعين لكين بنصر ربك مؤمنين
والكوره الساحره عارفه طريقها للشبكه
الله الله يابدوى جاب اليسرى

من بعد ماخطط لمسارها مهندس فنان
وسع يابوى للحريفه ف يمين وشمال
فراعين صحيح لايهمها أسود أوأفيال
بعد التوكل ع الحنان تيجى النصره
الله الله يابدوى جاب اليسرى

حجّب شباكك ياحضرى بسورة الفاتحه
مايهزها ديركوبا وايتو برجله الكاسحه
جلبرتو,فلافيوا اهو تايه كسره وفاتحه
بين جمعه وفتحى, واحمد حسن جاى بالبشرى
الله الله يابدوى جاب اليسرى

شدد هجومك يامتعب عمرو وزيدان
وافتح جنابك ياشوقى والوسط كمان
تسلم شمال ابوتريكه مُلهَم فنان
و بأخلاق فارس يهدى الفوزلابطال غزه
الله الله يابدوى جاب اليسرى

الله ع الفرحه اما بتيجى وقت الزنقه
وتشق الصمت, تكسر الدايره الخانقه
تعلن بقوه اننا قادرين
نمسح دموعك يافلسطين
ونعيش جهادك دنيا ودين
ويكون أملنا كبير ف المولى وف بكره
الله الله يابدوى جاب اليسرى

عايده العشرى

هاتى دموعك ياسما ولاتبخليش
صفى عيونك واغسلى ران القلوب
تنتعش ,يمكن تعيش
صحى موات الحس فينا
فوقينا
واعلنى غضبك علينا
ماترحميش
يلا ابرقى ..فتّحى ع النورعنينا
وألعنينا
واحنا بنخبى ايدينا ف الرمال
ونقول مُحال
ينصلح للقلب حال
ايوه ....إرعدى
وخبطى فوق الرؤوس
حتى بقامع من حديد
خلى العقول اللى خلاص طالها الصدا
ترجع تجيد
فن الحياه
يااه ع العمر يااه
اللى عدى واحنا نايمين مخدوعين
تنسرق منا السنين
واحنا.... واكلنا الحنين
قاعدين بنرجع بالزمن
أيام ماكنا..
واحنا
واحنا
لحد مافاتنا الطريق
ولسه محتاجين صديق
ياخد بايدنا..!!
نفتح الاحضان يقابلنا... بضيق
أنتوا فييين...واحنا فين
انتوا مين
آه صحيح كان ليكوا شان
بس ده كان..راح... زمان
الوقت ده زمن اللى جاى
ياتعيش
وتبقى قدنا
ياتموت فطيس
مالكش ديه عندنا
واختار طريقك يا.....صديق

عايده العشرى

من قد ايه والحلم جوايا إندثر
لما اقتصر
من بين حطام اليأس
على شنطة سفر
ومن المحيط للخليج
والوهم لعيونى إحتكر
فوق الجبين هم انسطر
اجرى كما الطير ف البراح
واخفى آلامك ف الجناح
توهتك مع الايام قدر
حمل حناياك بالحنين
واوعى الأنين
يبان ف تغريد الوتر
وارفع جبينك
خبى نظرة لانكسار
وارسم البسمه بوقار
واوعى تستجدى القبول
من البشر
وارجع مع المغرب لدار
لاهيا دارك
ولافيها حتى ضياء لنارك
خليك كده وحيد قرارك
واوصل نهارك بالسهر