تم بحمد الله وتوفيقه اصدار باكورة انتاجى من شعر العاميه المصريه بعنوان حنين

وبيمينك وسمّى ياطبيب ع الروح
طهر إيدينك.. وبريحان م الروح
طبطب وأهمس للحبيب همسه
برد وسلامه تشفى اى جروح

قوله انى واقف ع الطريق ماهانام
ريشه ف مهب الريح ف دوامة ايام
مستنى طلة عينيه ع الدنيا من تانى
لجلن تجيبلى الحياه وترد فيا الروح

ساعة زمن ديا ولا الزمن كله
ودنيا فاضيه عليا متشبثه بضله
وبحق سورة "يس" اقسمت ع المولى
ليردهولى سليم وافديه انا بالروح

بوسه مابين العينين ياطبيب وانتَ
راجع لى بالبشرى وبنبض للشرايين
فاضل كمان ساعتين وتنور الدنيا
والصبراجيبه منين

قولى فين وانا اروح

يامحلى طلة عينيك ع الدنيا من تانى
وسجده للرحمن على نعمة رجوعك
يارب تمم شفاه عبدك أهو وطوعك
والحمد مايوفيك فى السر أو بالبوح

مفتتح

على جناح الخيال رفّت
ورقصت
فوق نسيم مسحور
وحوالين الضيا شفّت
وكشفت
عن حنين مستور
ويادوب الشعاع لمست
ونار شبّت
وكان ياماكان
فراشه...وشعاع النور
*******
ومابين السطور مغمور
ياحرف النور
ومايفكك سوى عقول البنات
حكايات ومسطوره
مابين اوراق
بتتحدى
طلاسم مالكه مفاتحها
بصوابعها
ولمسه من طروف
الطرف
يفز الحرف
يعزف ع العقول اجمل اغانيها
حبيبة قلبى ياساره
وروح بابا
نجاحك تاج على راسنا
وبكره واللى جاى اجمل
بترسم احلى ملامحنا
حوريه واجمل الاحلام
ودنيا كلها سامعه
ندا الجامعه
ومستقبل
بنور مبدور

عايده العشرى
2009-06-05

والله وشنبك خط يابوحميد
شنبك خط بجد
فرحة قلبى ياناس
وانا ماشيه
وسانده دراعى
على عضلاتك ياد
وانا نفسى احصل كتفك
حتى ولو بالكعب العالى
ربى يخليك ليا ياغالى
ويمتعنى بنظرات حبك
دايما و بحنية قلبك
بس اياك تفضل..ماتجيشى
مُزه وتخطف قلبك منى
وافرح بيك مع كده والاقينى
باجرى ياناس عشان اخطبهالك
مانت جميل ويادوب هتقشر
واقعد بقى انا كده واتشرّط
فشرت مارى منيب واتشطر
يخرب عقلك ياد كبرتنى
جد الجد
لكن هارجع تانى وهاصغر
يوم ماالعب مع حبة عينى
ولد الولد
\2009\ ماما....19\5

هنيالك يامصر حقك تفرحى
جايلك صبايا والله زين الزين

واحده تقول الشمس قعدت مطرحى
والتانيه بدر التمام قاعد بين الحاجبين

وازاى( ياكيتى) ييجى يوم وهتصبحى
من غير نَفَسّهُم والله مالك عين

يطلع نهار
مايلاقى عزه فى ورد
ولايلقى هاله بتجرى تسعى ف خير
ظابطين ساعاتهم ويا طلعة فجر
ومعمرين جامعك فى درس الظهر

فاتحين بيوتهم للصحاب كالأهل
ومجمعين ع الخير قلوب الكل

وبنات بلد فى الجدعنه وفى الجد
بين الأحبه قلوبها نسمه حرير

والله ياهاله ماعاد شوبنج هيسُر
والله ياعزه الصحبه ناقصه كتير

دايما يارب ف هنا
سواء هناك او هنا
وياريتنى وياكوا انا
وعلى بلدنا اطير

طاير
بين حدّينَك
حاير
على ارجوح واخدك
ومسافر
تلقى الروح

وحدك متشعلق
قادر قلبك
برضه يعافر
ُمنى وجروح
بين جبلين
أحلام شايلنك
فين هتروح...؟؟

امسك واتشبث بمصيرك
اوعى ف لحظة تلوم البخت
ولاياصاحبى تبص لتحت
خليك ثابت
ومكلبش فى الذات من جوّه
عدى الهوّه
داحنا وصلنا لأضعف قوة
تربط بين الحلم وبينك
مد ايديك المس جناحينك
لساك قادر
توصل بر الروح بشروق
حاضن آخر نقطة ضوء

جرة قلم
جره ومشت على شخبطات اعوام عجاف
رجعت على جبينك بياض
واتمد لعيونك بساط
لون الربيع لو مر ع الصفصاف

نزل الندى من بين جفونه بشوق
اترعرت نقط الحروف بعد الجفاف
ابدا ماكانشى حبر جاف
ده مداد حنان
أحيا حروفك من عدم
جرة قلم...
رجعت امانى الحرف
كما نسمة هوا هفهاف
اوعاك تخاف...
طول ماانتَ مسنود
بالقوسين
وخاتمها بالتنوين
واختار سكونك لو لقيت
إتعكّر الشفّاف

ياحروف وجرّت فى الأسيّه كتير
إترصى تانى ف بحر رجز جديد
مايهمكيش لو شذ ناسخ يوم
او حرف عله انكسر من حبتين تشديد
اهوّن عليكى المنع م التصريف
ولايوم يكون حلم الجعان اسفاف

سلام ع الدنيا من بدرى
وانا باجرى
ورايحالك
ماخدت ف رحلى
غيرفرحى
وأملى
رضاك وسعيالك
ولو آخرمكان فى الكون
ماهاتعبشى
ولو هامشى
على رمشى
هالف الكووووون وجيالك

ماهواش فرض يتقضّى
ده حلم على طبق فضه
وعشت العمراتقضّى
بنوره لحين مايتفسر

ويتقدر
والاقينى على بابك
واتشبث باعتابك
فى حجرك يابراهيم
أسجُد
وتحت العرش
اتهجّد
واملّس ع الحجرلاسعد
وتلمس روحى ترحابك
فأستبشر
وأتهلل
واختم لى ف صلاة الفجر
كام خاتمه
تزيل عتمة ذنوب
وتجود بغفرانك

فى اطهر بقعه طهرنى
بماء زمزم وتغسلنى
تنقى توبى م الادران
ترجعنى
كطفل وليد
وتتعهدنى برعايتك
وسلطانك

ياراجعه والفؤاد مجبور
وهالة النور على جبينك
ياأجمل م الصبايا الحور
رضا وقبول وزاينينك
وحواليكى ملايكه تدور
تبشّرهُم مُحبينك
ينولوا حجك المبرور
يباركوا ذنبك المغفور
يهنوكى بعُمرينك
ويدعولك
تعودى فى الحجيج الجاى
ولا نعلم منين وإزاى
ده ربك كرمه يوم مايريد
تجليت فى عُلاك يارب
سبحانك

آخر مسافة شوووق

راجعين نتنفس من تانى
لاتقولى عوادم ولا هيش

محلاها م الجنه نسايم
لملمى ف عطورك ياباريس

ده ترابها ...التبر زكايب
حاضر اوغايب.. لك نايب
وأوناسها دول أهل ..نسايب
إن كانوا صاحيين أودراويش

محلاها اللمه الصبحيه
على طبق الفول ...
من غير عيش
وكباب م المصرى ابو ريحه فايحه
غار الهامبورجر والكيش

على ضفة نيلك نتمشى
لو حتى مش راح نتعشى
يكفينا الترمس للمذه
والشاى بالنعناع نعانيش
تسقط (ياستار بكس) مفيش

غير شايك يافيشاوى.. الله
والركعه فى حُسينه حياه
تذكار من خانك ياخليلى
والحنه فى لازهرمحلاه
ببخوره يدفى النخاشيش

وتعيش..... ياوطنا تعيش

تحيه الى البطل الذى قفز على دبابه العدو وفجر نفسه

ولو ما املكشى غير جسمى
اجود بالجسم
ولو ماحيلتى إلا الروح
ف روحى الحسم
ولا تخطى على ارضى
حدا وغربان
دى ارض امان
فداها الروح ومن ربى
المدد والدعم

تعالى ياصاحبى حزمنى
ولف بحزم
بارودك فوق على صدرى
وشد بعزم
ووصل طرفه مع نبضى
ده نبضى شرار
نموت احرار
ولا نهابشى
لاموت ولا دهم
امانه تعود تقول لاُمى
حبيبك شهم
ماخلّصهوش يشوف خنزير
جبان موْتور
مصوب فوق جبينك سهم
ومااستحمل يقف عاجز
وتحت حصار
ولا يستنى يستجدى مجالس وهم
سلامى ياامى نتقابل
ف عليين
عايده العشرى

أمتى يافجر النور
تطلع على غزه ...!!؟

طال السواد والليل
حالف مايستهدى
إلا اما ياخد معاه
آخر جبان متهان
للسُلطه يستجدى
طوّح ياليل بيهم
مرجح كراسيهم
ده المنتمى ليهم
بالذل واستكفى

ولوحدى انا صامد
باحمى الحدود والعرض
واروى بدمايا الارض
وافضل انا شاهد
يوم ما الجتت عامت
فى الخزى والخذلان
ياحكم عربى جبان
عن الحقوق ساكت
هافضل انا صامد
واشهد طلوع النهار
على جبين الاحرار
وان العيون نامت
فالجنه للابرار
شهداءنا ياغزه
يارمز للعزه
ومتوّجه الثوار