رقصة الألم
فى زحمة عتمة الايام
بنستنى بصيص النور
خيوط الفجر تتجمع
ويتعلق معاها أملنا ...والمقدور
نعيش نحلم...ونتمنى
ونستنى يجينا الدور
يا مين يوصل لاحلامه
ومين هيتوه
وحوالين وهجها ياعينى يعيش مأسور

شعاع من نور
بيندهنى
شعاع من نور
خيوطه الدافيه داخله لى
ما بين السور
وانا طول عمرى كان نفسى
ف قلب جسور
اعدى بحور
واجيلك ياقمر عالى
ف قربك عمرى يحلالى
هناك ف النور

لكنى وحيد
ومتسلسل هنا ف حديد
واخاف أنفك
بحور العتمه واخدانى
وليه نفسى محاوطانى
بحيره وشك
خيوط شرنقتى دى اشواك
واخاف اقطعها القانى
تايه فى الشق
واخاف انشك

ومالك ليه ياليل قاسى
وبتحيّر
نجومك غايره لاتواسى
ولاتنوّر
وأمتى فجر احساسى
ياليل يطلع
يكون فى الضلمه نبراسى
وأتغيّر

واقدر امد جناحاتى
واعلّى لفوق
الف وادور
على دروب الامل

والشوق
وادوب فيك يا شعاع النور
عاشق معشوق
ولايمنعنى لامكتوب ولامقدّر
ولايرجّعنى ليل خوفى
اموت محروق