جابت دورافها القوافى

جابت دورافها القوافى

وقفّلت ابيات قصايدك البيبان

بعد اللى بان

من بنات افكارجنابك

آه ع اللى نابك.....

اللى قال خاين..جباان

واللى قال ده مالوش أمان

واللى قال مالهوش مكان بين الصحابه

واللى أثبت ان فعلا 

كلنا عايشين ف غابه

واللى اصدر أمره علشان

اقتناصك

واللى بيشاور عليك وينصح الكل

اجتنابك

كلهم...خبرا سياسه

كلهم ساقطين دراسه

وانت مليت الكلام

(1)

يوم 25 يناير 2011

زى النهارده كل عام كان عيد

المفترض عيد الحمام ..عيد السلامه والامان.

كان يطلع العادلى الهُمام والمكر طالل م العيون

يتباهى وبلمحة جنون

وف ظرف طارئ

بعدل قوانين الطوارئ

وفضل صبيانه الفتيه

قضى على الفتنه الطائفيه

وقبض على الفاعل

فلسطينى جاهل...

وللا لبنانى غافل...

المهم...

مالناش حبايب

ولاقرايب

مالناش غير الشايب

او ابنه اللى ف الكرسى راغب

وساندينه التعالب

الكلام ده كان زمان

اما النهارده...يوم جديد

نادى الميدان ع الندى

والكل لبى الندا

حواديت من ميدان التحرير

كان ياماكان ياساده ياكرام ولايحلى الكلام إلا بذكر النبى عليه الصلاة والسلام

(1)

طول عمرنا والميدان كاين فى وسط البلد

شامخ وطالل ع المدينه -ام التاريخ بتوحد الفرد الصمد-

شاهد عيان ع اللى اشترى واللى باع واللى مات واللى اتولد

صامت ، وبعيونه الحزينه... شايف محاولات الهدد

بتزيد...........

وف جوفه تحت الرماد الناريوم بعد يوم بتقيد

وف يوم ماقدرت تحتمل

انفجرت النار اللى ظلت بين جنابه بتعتمل

لفظت حكاوى.....

وإن كنت غاوى

وإن كنت ناوى

تلحق قطار الحكاوى

تعالى وتواصل معانا فى....

حواديت من ميدان التحرير

صباح الخير يازيزى

صباح الخير يازيزى

وكان نفسى بكارت معايده ابعت لك

وأيد الشمع واكتب لك

تلات سلامات

وألعن فيه ليالى الغربه والمسافات

وأقول دايما ف بالى يازيزى لمتنا

وفاكره الحى والشارع

وبيتكوا اللى فى ريح جامع

لا صوته آدان يوتركوا

ولا زحمة صلاة الجمعه على بابكوا

سماحة عمى بيوزع بلح رمضان على الصايمين

وكحك العيد تقابله طنط بالفرحه

سنين طارحه امل وأمان

وفاكره يازيزى تختتنا فى اول صف

ومشوارنا وحكاوينا اللى مابتخلص

كبرنا وفتحت اوراقنا ع الاغصان

وأول حد أسريتله بدقة قلب

ويوم خطوبتنا كنتى انتى الوصيفه بحب

ياعشرة عمرى والصحبه

مافرقناش غير الغربه

ودلوقتى

خسيس كداب

وإيد إرهاب

وبتحاول تهد ف لحظه كل اللى ف سنين بنيناه

جاوبينى

صحيح يقدر؟؟؟

إوعاك تقول

إوعاك تقول أنك صحيح بتحبنى

مش رايحه اصدق يا أعز الامنيات

إوعاك تقول انك صحيح لفيت بلاد

وغزيت ممالك

وبايديك خُضت ف مهالك

وفتوحات

وجمعت من أعلى البحار اللؤلؤات

صارعت موج...

وحاربت كل الجنيّات

إوعاك تقول أنك عشانى عشت أقسى الأُمسيات

عديت نجوم , وغزلت من ضى القمرالفوستونات

وكتبت فى عيونى غزل

يهزم قصايد عنتره بكل اللغات

إوعاك تقول... ده انا عشت أحلم يوم تجينى

و مهرى قلبك بين كفوفك والمشاعر دى حكايات

ولما حليّت لك سنينى

الأوان يا ضى عينى كان سبق

عـــدا و فات

والوقتى ...عايزين معجزه

وماعادش زمن المعجزات

فازت هذه القصيده فى المسابقة

الادبيه التى اقامها منتدى ابناء طيبه 

وطبعت فى ديوان سيمفونية البوح الذى اصدره المنتدى للقصايد الفائزه

عايزه اقولك زى ثومه ........كان زمان.!!
قلبى ده اللى كان بيتمنى تناديه
ترقص الفرحه ف عينيه-
لو لمح ع البعد طيفك
...وتواسيه
ف الليل خيالات من طيوفك
جفت النبضات خلاص على وجنتيه..
تيه
تيه غرورا
بس بكره تتوه مرورا
بالاماكن
لما يبقى الذهن شارد
حزن ساكن
ليل معاند
يبكى دنيا اتسرسبت من بين ايديه.

وآآآآه يامايه

وآآآآه يامايه محتاجلك

وعمرى بشوقه يندهلك

لكن بينك وبينى بلاد

دُعاكى ده زاد

وباقيلى

ياطول ليلى

وانا باجتر ف الذكرى

وباستنى طلوع بكره

الاقينى

ف حضنك تانى

ضمانى

بحنية عينيكى السود

دى مالها حدود

ونظره واحده تحيينى

وتروى عمر حرمانى

وطبطبتك على ضهرى

تزيح عنى

وتغسل قلبى

من تانى اعود طفله

ف حجرك قاعده تتملى

وتتهجى علوم الكون

على جبينك

جمال فطره

واقولك ايه...

وحشتينى

يجازى البُعد والغربه

تم بحمد الله وتوفيقه اصدار باكورة انتاجى من شعر العاميه المصريه بعنوان حنين