ياوحشانى بقالى سنين
وفايتانى انا العطشان
لبحر حنانك الدافى
يانبع حنين
ياوحشانى
خدتنى الدنيا من حضنك
رمتنى ف غربه وف بُعدك
انا عايشه
انين ذكرى
ولحن حزين
وفاكره عيونك الخضرا
خضار قلبك
طرح فدادين
جدايل شعرك الصفرا
دهب شمسك
دفا حضنك
وضى العين
ولمسة خدك الناعم
بساط سحرى
واخدنى لفين
على دنيا من الاحلام
فى حدوته بتحكيها
ورنة صوت بتعلّم على الوجدان
وفاكره باليتة الالوان
يافنانه
ورسمت ع الطريق
بكره
واجمل صوره للانسان
على عهدى معاكى
بكل نقطه من دمى
راح اطوى بسرعه الايام
واجيلك واخدك فى حضنى

ياست الحسن يا امى